Su Lagu Superiore est su prus mannu de sos Grandu Lagos de s’Amèriga de su Nordu. Su lagu est alindadu dae s’Ontario canadesu e dae su Minnesota istadunidesu a su nordu e a s’uestu, e dae su Wisconsin e su Michigan istadunidesos a su suddu.
Est cussideradu zenerarmente comente su lagu de aba durche prus mannu de su mundu pro superfìzie. Pro ballùmene, est su de tres lagos de aba durche prus mannu de su mundu.
Sa tribù ìndia de sos Ojibwes naraiat su lagu “gichigami”, chi sinnìfigat “aba manna”. Henry Wadsworth Longfellow aiat iscritu su nùmene comente “Gitche Gumee” in “The Song of Hiawatha”, a s’aguale de Gordon Lightfoot in sa cantone sua “The Wreck of the Edmund Fizgerald”.
Sos primos isproradores frantzesos chi si fiat acurtziados de custu mare internu mannu peri su riu Ottawa e su lagu Huron in tempus de su de 17 sègulos, si fiant refertos a s’iscoberta issoro comente “Le lac supérieur”, in su sentidu de “lagu in subra de su lagu Huron”. Su lagu fiat istadu naradu finas “Lac Tracy” dae sos missionàrios zesuitas de su de 17 sègulos.
Sos ingresos, addaghi aiant leadu cuntrollu de sa rezione dae sos frantzesos in sa dècada de 1760, in fatu de sa gherra intre frantzesos e ìndios, aiant ingresizadu su nùmene de su lagu in “Superior”, sende superiore in mannària a totu sos àteros lagos de cussu continente bastu.
